Diasabra cu a pasa den un Aruba Entertainment cu hopi ambiente a tuma luga e Tumberito Festival Infantil/Hubenil  2009 cual festival a bin duro duro despues di 5 aña. E Maestronan di ceremonia tabata den persona di Julisa Boekhoudt y Lionel Dirksz. Cu e All Stars Band dirigi dor di Amado Rosina a compaña 16 participante, cual 11 participante  infantil  y 5 Hubenil.

Tur presente por a goza di un bon y tremendo Festival di Tumberito. Durante e anochi aki 3 persona a haya reconocemento kende tabata Chanella Lopes cu tin 5 aña consecutivo participando den e festival di Tumberito, Vederick Ras pa su ultimo aña den tumberito y cu otro aña lo forma parti como tumbero den e tumba festival 2010, Rodrick Franken cu ta e unico persona cu te cu awo a logra bai cu e titulo di tumberito infantil, hubenil y cu a bira e Rey di Tumba 2008 y di 4 luga di tumba 2009.

E resultado pa e tumberito infantil/hubenil ta lo sigiuente; den seccion infantil; Cantante Mas Popular Nicole Izquiel, “Best Costume” Ivone Ivienne Hernandez, na di 3er luga Nicole Izquiel cu su tumba“Bai nos ta bai”, di 2do luga Ivone Ivienne Hernandez “Habri porta pa’mi drenta” y como Ganador absoluto Jonathan Croes “Laga nos carnaval brilla”.

Den seccion Hubenil; cantante Mas Popular  Chanella lopes, “Best Costume” Chantal Quant, 3er luga Chantal Quant  cu su tumba “Subi Caya”, 2do luga Jeanchrisjair Vesprey “E mecanico di carnaval” y como Ganadora absoluto  Chanella Lopes “Zona e cashaca, ricibi’e”.

Stichting Arubaanse Carnaval “SAC” kier a duna un danki y pabien na cada un participante, huradonan, CATC, comision y na tur persona cu di un of otro manera a yuda pa cu e Tumberito Festival infantil/Hubenil 2009.

Alabes SAC kier a invita e pueblo Carnavalesco pa e siguiente actividad cual ta e pre-final Calypso y Roadmarch Contest 2009 cu lo tuma luga dialuna, diamars, diarazon y diahuebs den Centro di Bario Brazil pa 7.30 pm