Famia Planea ta un fundashon cu ta traha riba tereno di prevencion di embaraso no planea tanto pa hoben como adulto pa medio di suministra informacion primeramente riba abstenencia. Pa esnan cu ta activo sexualmente of ta pensa pa bira sexualmente activo Famia Planea ta conseha pa haci uso di anticonceptivo y ta ofrece productonan anticonceptivo gratis pa hobennan y pa adultonan tin miembrecia na un prijs hopi reduci pa full un aña. E aña aki Famia Planea ta introduci Crown un producto nobo, cual ta un condom color roos super fini y pa e motibo aki Famia Planea ta promove e producto nobo aki cu e slogan Link 2 Pink.

Durante henter aña y un biaha mas den carnaval 55, Famia Planea ta tene na cuenta cu pueblo di Aruba su proteccion.

Pa e temporada aki di carnaval Famia Planea tin un pakete special di proteccion pa tanto e carnavalistanan como esnan cu ta para na banda cu ta hiba e nomber di :”Pink Pack”

E “Pink Pack” aki ta consisiti di diferente productonan cu tin di haber cu proteccion di nos curpa. Mirando e solo cayente ta hopi importante pa proteha nos cuero contra e rayonan solar aki y e pakete aki ta contene sunblock pa adulto of mucha danki na Banana Boat. Tambe e “Pink Pack” ta contene earplugs pa proteccion di nos oido, esaki ta danki na W.E.B. Aruba N.V. y All Saftey Wear y tambe tin e opcion pa inclui pa esnan cu tin mester pa no lubida e parti importante di proteccion contra embaraso no planea como tambe malesanan transmiti sexualmente, condom Crown danki na Famia Planea y condom Shadow danki na Aruba Trading Company.

Como extra tin pakete cu ta contene sea un t-shirt cu e slogan Link 2 Pink riba dje imprimi of un boter di awa cortesia di Tropical Botteling Company. Tambe tin paketenan special pa nos muchanan cu algun regalito pa nan.

Ta responsabilidad di cada ken pa proteha nan curpa y sea semper conciente di nan actonan.

E “Pink Pack” aki ta completamente gratis danki na tur e companianan cu a contribui pa realisa esaki y kere den e campaña di proteccion total.

Tur persona interesa pa ricibi un di e “Pink Pack” aki por pasa libremente na Famia Planea San Nicolaas (tel: 584-9591) of Famia Planea Oranjestad (tel: 588-9591)