Aruba un biaha mas ta celebra e apertura di e temporada di e celebracion cultural mas grandi cu ta wordo celebra anualmente. E temporada di nos dushi Carnaval. SAC un biaha mas como e organo oficial kende ta encarga cu e coordinacion di e celebracion di Carnaval ta preparando pa asina e pueblo di Aruba por celebra en grande e apertura di e temporada di Carnaval nr 56 pa 2010. Riba diaranson 11 di november 2009 parti mainta lo tin un celebracion pa diferente invitado na Chino Latino cu ta cuminsa pa 10or di mainta. Pa e parti anochi lo ta bai tin oportunidad pa haya un bista di diferente trahenan di e gruponan di Carnaval cu lo ser admira den e parada na 2010.

Alabez lo tin 2 banda musical pa deleita e pubico presente. Tambe lo ta bai tin tono di brass band caminda cu e figuranan principal di Carnaval 55 lo presentanan mes na e publico presente. Di 7or pa 8or lo ta bai tin un steelband cu lo duna e publico presente y sigur nos bishitantenan di exterior e ambiente y sabor di Caribe y e musica cu tabata wordo baila den e Carnaval di pasado. Pues tur esnan interesa pa pasa un anochi di ambiente di Carnaval por ta presente ya cu e entrada lo ta gratis. Pues SAC ta extende un invitacion pa Aruba completo pa bin disfruta e apertura di e temporada di Carnaval nr 56 di 7:00pm pa 12:00am.