Pa hopi hende carnaval ta un temporada di alegria, goso, cu hopi fiesta, baile y canto.  Pero den e temporada aki tambe nos ta mira situacionnan unda e interes di mucha no ta na promer lugar, unda no ta tene cuenta cu mucha y cu loke ta apropia pa mucha. Tin carnaval di adulto y tin carnaval pa mucha caminda e mucha mester ta poni central. Nos tur mester corda cu durante carnaval tambe mester cumpli cu e Derechonan di Mucha. Specialmente derecho riba diberticion sano, derecho riba amor, comprension, cariño y sociego, derecho riba enseñansa, y derecho riba proteccion contra maltrato, descuido y negligencia.

Muchanan no mag di bira victima di falta di responsabilidad di adulto !!

Aki ta sigui algun punto cu por yuda mayor y otro adulto haci e temporada di carnaval uno agradabel y safe pa mucha:

·                     Pone bo yiu na promer lugar.

Mester respeta e mucha y no fors’e haci cosnan cu abo y otro hende ta haya leuk, manera siñ’e y encurash’e balia na manera no apropia pa mucha.

·                     Combersa cu bo yiu.

Tuma tempo pa combersa cu bo yiu tocante cosnan (porta straño y diferente) cu e por mira den e dianan aki. Reacciona riba su preguntanan y su preocupacionnan.

·                     No laga baby y mucha bou di 4 aña participa den parada.

·                     No forsa mucha pa participa den parada of otro actividad carnavalesco.

·                     No hiba mucha actividad carnavalesco cu ta pa adulto.

·                     Cuida y guia pa bo yiu.

Busca alternativa si bo tin yiu chikito of yiu cu no ta gusta carnaval y abo si kier bai. Esaki por ta un babysitter of un centro di mucha. Check cu famia, conocirnan, den corant of informa na Fundacion Pa Nos Muchanan pa centronan cu  ta habri. Importante ta pa bo sa si e persona cu lo bai wak pa bo yiu ta un adulto responsabel y amabel.

·                     No sali tur dia pa algo di carnaval.

Bo yiu tin necesidad di bo compania y atencion.

·                     E rutina diario ta importante pa e mucha crece sano.

No laga bo yiu perde soño pa actividadnan pa mucha cu ta tuma lugar den siman anochi. Scol ta   sigui su mañan! No laga bo yiu presencia programa di television y radio cu ta tuma lugar den ora cu ta su ora di drumi.

·                     Evita perde di mucha durante paradanan.

Tira bon bista riba nan. No bai goza y lubida riba nan.  Depende di su edad siña bo yiu bisa cu e la perde su mama/ tata y pa e no drenta panico si e perde bo.  Mustr’e persona uniforma manera polis cu e por acudi na dje. Percura tambe pa e mucha sa su nomber completo, adres y telefon of  tin un carchi cu e informacion aki pega na su paña

·                     Responsabilidad pa mucha y uso di droga y alcohol.

Ta conoci cu alcohol y otro droga tin efecto riba e capacidad di hende pa reacciona na manera adecua y rasonabel.  Den e temporada di carnaval tin hopi hende, tin mayor tambe, cu ta bebe di mas y ta usa droga.  Evita perde control riba bo mes y hinca mucha den situacion peligroso y dañino manera causa accidente cu auto, maltrata mucha cu palabra y dor di dal e.

Carnaval mester keda algo agradabel pa mucha, unda nan por pasa ratonan alegre y contento. Copera pa nan por goza di carnaval.  Guia nan, duna un bon ehempel y proteha nan.

Pa mas informacion por acerca Fundacion Pa Nos Muchanan na Cumana 2, tel. 583-4247 of

588-0856, fax 583-5658 of e-mail This e-mail address is being protected from spam bots, you need JavaScript enabled to view it